Կարաք թեյ խմեք, բայց վախում եմ՝ իրենք ավելի շուտ հասնեն Երևան թեյ...

Կարաք թեյ խմեք, բայց վախում եմ՝ իրենք ավելի շուտ հասնեն Երևան թեյ խմելու:

SHARE

 

Ես ոչ մեկի «դաբրոյով» չեմ ապրել, ոչ մեկի «դաբրոյով» չեմ վերադարձել: Այս մասին Սիվիլնեթ-ի հետ զրույցում ասել է Լեռնային Ղարաբաղի պաշտպանության բանակի նախկին հրամանատար, ԼՂՀ պաշտպանության նախկին նախարար, գեներալ-լեյտենանտ Սամվել Բաբայանը, ով երկարատև բացակայությունից հետո վերադարձել է Հայաստան:
«Մարդիկ, ովքեր դրա մասին խոսում են, իրենք հենց «դաբրոյով» են ապրում, իրենց արշինով են չափում: Իրենք հոգեբանությամբ ստրուկ են, իրենց թվում է, որ բոլորն իրենց նման ստրուկներ են: Ես ձեզ վստահեցնում եմ, որ ես «դաբրոյով» չեմ ապրում»,- նշել է Սամվել Բաբայանը:
Դիտարկմանը, թե Ձեր վերադառնալու պատճառը քառօյա պատերազմն էր, արդյո՞ք Ադրբեջանի բլից-կրիկն արդյունավետ էր, ԼՂ պաշտպանության բանակի նախկին հրամանատարն ասել է, թե համաձայն չէ գնահատականների հետ, որ կատարվածը պատերազմ էր կամ բլից-կրիկ:
«Դա եղել է դիվերսիոն գործողություն, որտեղ հակառակորդը քայլեր է ձեռնարկել պատժիչ գործողություն կատարելու ու ստացել անսպասելի հաջողություն, որից հետո փորձել են հաջողությունն ամրապնդել: Երկու կորպուս ամրապնդվել է այդ դիրքերից, ինչից հետո մերոնք փորձել են նախահարձակման անցնել, վերականգնել կորցրած դիրքերը, որն ինչ-որ տեղ հաջողվել է, ինչ-որ տեղ անհաջող է եղել: Անհաջողության պատճառով հակառակորդը կիրառել է հրետանի»,- շեշտել է Բաբայանը:

Անդրադառնալով կորցրած 800 հեկտար տարածքին՝ Սամվել Բաբայանն արձագանքել է. «Ես չգիտեմ, ով ա մետրով չափել՝ 800 ա, թե 1800…», ապա շեշտել է, որ այդ դիրքերը երկակի ռազմավարական կետեր էին, ապահովում էին բնակչությանն ապրելու համար, հողերը Ղարաբաղի բնական սահմաններն էին, «բռան մեջ էին պահում»:

«Մեկն ասում ա, թե էս հողերը ստրատեգիկ էին, մեկն ասում է, թե ստրատեգիկ չէին… Էդ մարդիկ չտեսած ի՞նչ են հասկանում: Չկան ոչ ստրատեգիկ դիրքեր, հատկապես, Մարտակերտում, բայց դա տրագեդիա չէ, պատերազմի ժամանակ կարող է հետ էլ գնան, պետք է դա մտածված լինի, ոչ թե անիմաստ կորցնենք: Սա է խնդիրը»,- նշեց նա:

Ըստ նրա՝ պարզ է, որ Ադրբեջանը պատրաստվում է երկարաժամկետ պատերազմի, հեռվից է փորձելու չեզոքացնել, իսկ սպառազինության խնդիր չի ունենա, արկերի արտադրություն է նախաձեռնում:

Վերջինս նշել է, ադրբեջանական քաղաքականությանը հակադրելու համար ռեսուրսներ են պետք: «200 միլոն դոլարի վարկ է վերցնում, փորձում է գնել նույնատիպ Սմերչ, Տոսս և այլն: Եթե իրոք դա են գնում, դա սխալ է, դա թյուրիմացություն է: Մենք չենք կարող բոլոր զենքերը, ինչ ունի Ադրբեջանը, գնենք, ասենք «ока за ока»՝ իրենք մեզ են խփում, մենք իրենց: Մենք չենք կարող այդքան արկ գնել, բերել Հայաստան, սկսենք ռմբակոծել իրենց, երբ իրենք բոլոր արկերի տեսակներն իրենց մոտ արտադրում են: Դուք պատկերացրեք՝ ամբողջը թափվի մեր քաղաքների, գյուղերի վրա: Հո նրանով չի, որ Բաքու թեյ խմենք: Կարաք թեյ խմեք, բայց վախում եմ՝ իրենք ավելի շուտ հասնեն Երևան թեյ խմելու: Չի կարելի գեներալսկի հագուստներ հագնել, կոլխոզի նախագահի հայտարարություններ անել, ամոթ է, մարդիկ մեզ լսում են, մեր վրա խնդում են»,- մանրամասնել է ԼՂ պաշտպանության նախկին նախարարը:
Բաբայանը հռետորական հարց է հնչեցրել նրանց, ովքեր գովերգում են հայ զինվորի ոգին՝ ասելով. «Հրթիռ, թե արկ ա բռնելու զինվորը օդում»: Բաբայանը նշել է, որ մենք իրավունք չունենք ասելու՝ զինվոր գնա մեռի, հանուն հայրենիքի:

«Հայաստանը սեփական բոխչա չի, որ մոնոպոլիա անեն: Դա 3 միլիոն ժողովրդի անվտանգության խնդիր է ու 7 միլիոն ժողովրդի թասիբի հարց»,- ասել է Բաբայանը՝ նշելով, որ նրանք, ովքեր մտածում են, որ իրենց հարստությունը, երեխաները պատերազմից չեն տուժի, սխալվում են:
Վերջում Սամվել Բաբայանն ասել է, որ ինքը քաղաքականություն մտնելու հավակնություններ չունի, բայց չի բացառել, որ եթե մի ուժ լինի, որին հավանում է, կարող է օգտակար լինել:

NO COMMENTS

LEAVE A REPLY